کندز کې د ۴۵ میلیارده افغانیو په ارزښت ښارګوټی جوړېږي
د امارتي شرکتونو لوی ریاست تر چتر لاندې د کندز سپین زر امارتي شرکت له لوري د هېواد په شمال ختیځ زون کې، پر ۱۵۰ جریبه ځمکه او د ۴۵ میلیارده افغانیو په ارزښت، استوګنیز ښارګوټی جوړېږي.
د کندز سپین زر امارتي شرکت مسؤولین وايي چې د امارتي شرکتونو لوی ریاست او د کور او ښار جوړولو وزارت له منظورۍ او د اداري پړاوونو له بشپړېدو وروسته به د دغې سترې پروژې عملي چارې، ډېر ژر پیل شي.
دا ښارګوټی له نړيوالو معيارونو سره سم طرحه شوی او په بشپړېدو سره به یې د شمال ختيځ زون د مرکزي سیمې (کندز) څهره نوې شي او ځایي اوسېدونکو ته به ګڼې سوداګریزې، استوګنیزې او اقتصادي اسانتیاوې رامنځته شي.
