د امارتي شرکتونو عمومي ریاست او عزیزي انرژۍ شرکت ترمنځ د ډبرو سکرو د استخراج تړون لاسلیک شو

د ریاست الوزراء اقتصادي مرستیال محترم ملا عبدالغني برادر اخوند په شتون کې د امارتي شرکتونو عمومي ریاست د رهبري او عزیزي انرژۍ شرکت د مسؤولینو ترمنځ د ۲۴۷ میلیونه امریکايي ډالرو په پانګونې سره د ډبرو سکرو له کانونو د استخراج، اکتشاف او همدارنګه د انرژۍ تولید په برخه کې تړون لاسلیک شو.

په همدې مناسبت جوړو شویو مراسمو کې د امارتي شرکتونو عمومي رئیس مولوي احمد جان بلال وویل چې د صنعت وده، دوامدارې برېښنا ته اړتیا لري او د هېواد د ډبرو سکرو له پراخو زېرمو او له کورنیو سرچینو څخه ګټه اخیستنه د صنعت پراختیا تضمینولای شي.

ښاغلي بلال زیاته کړه، چې د دغه تړون په پایله کې موږ غواړو د کورنیو سرچینو په کارولو سره د هېواد د اړتیا وړ برېښنا تولید او د انرژۍ په برخه کې ځان بسیاینې ته ورسېږو او بهرنیو هېوادونو ته د برېښنا د پېرلو په بدل کې د کلني میلیونونو ډالرو د وتلو مخه ونیسو؛ همدارنګه د ډبرو سکرو د استخراج او د برېښنا تولیدي دستګاوو کې زرګونو هېوادوالو ته کاري فرصتونه برابر کړو.

همداراز د امارتي شرکتونو عمومي رئیس وويل چې د کار چټکتیا او د کیفیت خوندیتوب ته پاملرنه زموږ له لومړیتوبونو څخه شمېرل کېږي او یاده یې کړه چې د چاپېریال د ساتنې په موخه د برېښنا تولید په دې لویه پروسه کې به له عصري ټکنالوژیو څخه ګټه اخیستل کېږي.

د امارتي شرکتونو عمومي رئیس، د ټولو تخنیکي او اداري ټیمونو څخه د مننې ترڅنګ هیله څرګنده کړه چې دغه تړون به په راتلونکې کې د افغان ولس د هوساینې، روښانتیا او د هېواد د تلپاتې اقتصادي پیاوړتیا سبب وګرځي.

د غونډې په ترڅ کې د عزیزي انرژۍ شرکت رئیس میرویس عزیزي په خپلو خبرو کې وویل چې د تېر په پرتله په افغانستان کې شته امنیت او روان وضعیت د پانګونې او کاري زمینې رامنځته کولو لپاره یو غوره فرصت دی او باید اعظمي ګټه ورڅخه واخیستل شي.

ښاغلي عزيزي زیاته کړه چې په هېواد کې د روانو پروژو چټکو چارو ترسره کولو ته ژمن دي او هڅه کوي چې په نږدې راتلونکې کې د پاتې پروژو چارې هم پیل کړي. 

د یادونې وړ ده چې له عزیزي انرژۍ شرکت سره د کرکر، شورابک، دودکش او اهندره او خورد دره له کانونو څخه د ډبرو سکرو د استخراج او اکتشاف د تړون موده ۳۰ کاله ده چې د یادې پروژې په عملي کېدو سره به شاخوا ۳۰۰۰ هېوادوالو ته د کار زمینه هم برابره شي.